زمان وحلاوة زمان البيوت كانت ع الطوب ولا تشطيب ولا كهارب
وف كل حيطة ألف شق والشقوق فيها عقارب
والنومة كانت ع الحصير والمخدة
جوز قوالب
وإن عطش القلة جمبه ولو جعان فيه عيش ورايب
ووسط البيت فيه طرمبة وجوه حوضها
فيه طحالب
والكانون والفرن بلدي وسطح البيت بالسبايت
حامد ربه ع اللى عنده تقولش عمده ولا نايب
والأعمار كانت طويلة والمرض كان عنه غايب
والبيوت عمرانة حب
و ع الدكة يتلموا القرايب
أما النهاردة بيته جنة
بس مليان بالمصايب
الفلوس والخير كتير
بس عدمان من الحبايب
والمرض مسايبش حد والهموم مرار ودايب
مش عارف هلاقيها
من الميه ولا الكهربا
ولا جزار الحبايب
ياناس حد يرجعني
لدوار سيدي الحاج
علشان أخد
من العمره نايب
وأملا حجري بلح
ولا أعبيه في الزكايب فينك ياأبويا
توزع على الناس البلح إنت وأمي على إللي جاي وإللي رايح
والأعمار بقت قصيرة والراحة عليها ضرايب
بقلم /سيد عبدالتواب السويفي
